Ако имате слободен капитал од околу 80 до 200 илјади евра и размислувате каде да го вложите, купувањето стан во Скопје може да биде една од поинтересните опции за инвестирање. За инвестирање во недвижности може да размислувате и доколку сте кредитоспособни, при што месечната кирија или зголемувањето на вредноста на имотот може да ви помогнат да ги покриете трошоците за камати и банкарски провизии.
Главниот град нуди широк спектар можности: различни населби со своја динамика, станови од различна големина, фаза на градба и стил, како и стабилни услови за долгорочно зголемување на вредноста. Покрај тоа, изнајмувањето на станот може да ви овозможи редовен месечен приход, што го прави купувањето недвижност во Скопје реална опција за оние кои сакаат да го „оживеат“ својот капитал.
Зошто да купите стан како инвестиција?
- Зголемување на вредноста со тек на време: Историски гледано, цените на недвижнините најчесто имаат тенденција да растат, особено во урбаните средини како Скопје. Со урбанизацијата, побарувачката за станови опфаќа различни профили на купувачи и станари – студенти, млади семејства, професионалци од други градови или земји.
- Редовен приход од кирија: Ако купите стан и го изнајмувате, можете да добиете стабилен месечен приход кој постепено ќе ви ја враќа инвестицијата, а воедно и ќе го зголемува вашиот капитал на долг рок.
- Флексибилни можности за издавање: Вашиот стан може да послужи и за краткорочно изнајмување преку платформи како Airbnb. Ова ви дава шанса да понудите сместување за туристи, со што добивате дополнителен приход и можност сами да одредите кога и колку често ќе го користите и/или изнајмувате станот.
- Подобар начин на штедење: Наместо парите да „лежат“ на банкарска сметка со ниска каматна стапка, вложувањето во недвижнина ви нуди можност вашите средства да бидат капитализирани.
Клучни фактори при избор на стан:
- Локација: Централните градски подрачја и места близу универзитети, деловни центри или поголеми инфраструктурни проекти (молови, болници, клучни сообраќајници) често носат поголема вредност и полесно се изнајмуваат.
- Фаза на изградба:
Инвестирањето во стан додека се уште е во изградба често носи најголем потенцијален прираст на вредноста. Цените на становите во оваа фаза обично се пониски отколку откако зградата ќе биде комплетирана и подготвена за вселување. Сепак, ова значи дека ќе мора да почекате извесно време пред да почнете да остварувате приход преку изнајмување, или пред да можете да го продадете имотот по повисока цена. Овој пристап бара трпение, но може да ви донесе значителна добивка на долг рок. - Состојба на имотот: Новите или реновираните станови се полесни за изнајмување и обично бараат помалку трошоци за одржување. Иако може да бидат поскапи за купување, тие овозможуваат побрзо влез на пазарот за рента.
- Големина и распоред: Помалите станови со една или две спални соби, често привлекуваат најмногу станари – млади парови, студенти или мал број членови во домаќинството.
- Ваши цели: Дали имате намера да го изнајмувате станот постојано, или можеби да го продадете после неколку години? Одговорот на ова прашање ќе ве насочи кон најдобрата локација и тип на имот.
Алтернативи за инвестирање:
Иако купувањето стан е солидна инвестиција, доколку сакате да ги оплодите вашите средства, можете да размислите и за:
- Парцелa или куќа со двор: Погодни за долгорочни планови, особено ако земјиштето има можност за понатамошна градба.
- Комерцијални недвижнини: Локали, мали канцеларии или магацини, кои понекогаш може да остваруваат и поголеми приходи од рента, но се и поскап сегмент.
- Финансиски инструменти: Инвестициски фондови, акции или обврзници – меѓутоа, овој вид вложувања бараат повеќе знаење и следење на пазарот.
Заклучок:
Ако располагате со слободни средства и барате поедноставна и постабилна опција за инвестирање, купувањето стан во Скопје е добра почетна точка. Со внимателен избор на локацијата, анализирање на пазарот и правилно управување со имотот, имате можност да го зголемите вашиот капитал и да добиете стабилен месечен приход. На овој начин, вашиот слободен капитал нема да „одмора“ во банка, туку ќе работи за вас, додека вие стекнувате реален имот со потенцијал за долгорочен раст.